القلوب السود .. تم إضافة الصوت

بعض القلوب إن جات أسْود من الصاج =فالقلب عندي طابخه فوق صاجه
ماهمني بالقول عاذل وهرّاج =وماني من اللي يستمع لسّذاجه
مدام لي في مهبط العز مدواج=صعبٍ على العاذل يوثق مداجه
عفواً .. دقيقه .. أعذروني بالإزعاج =ترا الردي دايم يحب العواجه
والرِجل لا سجّت على كل منهاج =ماهمنّي ضحك الطفل وإبتهاجه
غيري ليامنّه سرا بالفكر داج =ضيع طريقه لا وضيع خراجه
لامن ونس بالقلب حارش ووهّاج =خطرٍ على عقله يجي برتجاجه
وأنا ضميري لا غدا فيه دولاج =يعقد جبين العز عندي حجاجه
ماهمنّي عاذل مع الخلق ولاّج =وماهمني ناسٍ تحب اللجاجه
أبدع قصيدي وتقنه فن وإخراج =وأدهن به اللي باحثٍ عن علاجه
ماهمنّي نوره وساره وريتاج = ما أبدعه إلا لمقصد وحاجه
وأنا أحمد الله ماني اليوم محتاج =دام الشعر حايط علي بسياجه
كنّي بحر من يامن الموج لا هاج= ومن يامن الغربي وهبة عجاجه
دامي لبست إمن المراجل كذا تاج =يبطي عذولي ما تغشاه تاجه
المرجله ماهي دخولٍ ومخراج =وماهي مزاج اللي تحقق مزاجه
المرجله فعلٍ نشوفه وهدّاج =ماهو مثل قطر الندى في زجاجه
ياعاذلي إن كان مابه من إحراج =ضم القصيده في سنن إبن ماجه
أحفظ قصيدي ياعسى مالك علاج =ما ينفعع المحتال كثر إحتجاجه
دام إن فؤادك بقعته بقعة الصاج =فعلم فؤادي طابخه فوق صاجه